Online FAQ // Анлайн: пытанні, якія найчасцей задаюць
1. Чаму вы ўсё-такі вырашылі рабіць кінафестываль у такі складаны час?
Рашэнне ўсё-такі правесці кінафестываль у такі складаны для ўсяго свету і Беларусі час далося нам няпроста. Спачатку мы перажылі адмену фестывалю ў красавіку 2020 з-за жахлівай сітуацыі з COVID-19 і немагчымасцю паказваць фільмы ў кінатэатрах і прывезці да нас замежных гасцей. Пазней мы сабраліся з духам у пачатку лета і вырашылі выкарыстаць цяжкасці як новыя магчымасці і рызыкнуць правесці фестываль анлайн у канцы верасня. Але з-за блакіравання інтэрнэту ў жніўні і жорсткіх дзеянняў супраць удзельнікаў мірных пратэстаў, у нас не засталося маральнай моцы і тэхнічных магчымасцяў падрыхтаваць усё своечасова. Прыйшлося адмяніць усё яшчэ раз. Але не праводзіць кінафестываль увогуле падаецца нам таксама надта няўдалым рашэннем. Праграма была гатова яшчэ ў красавіку, і адкладаць яе на 2021 год ідэя так сабе, таму што фільмы яшчэ больш устарэюць. Ды і беручы ва ўвагу тое, што амаль усе фестывалі ў Беларусі ў гэтым годзе адмяняюць альбо пераносяць, правесці «Паўночнае ззянне» нават анлайн — значыць для нас выказаць сваю падтрымку, салідарнасць і датычнасць праз тое, што мы добра ўмеем рабіць.

Мы разумеем, што шмат каму зараз, хутчэй за ўсё, не да кіно. Але праграма кінафестывалю «Паўночнае ззянне» ніколі не была пацяшальнай. Яна заўсёды, і гэты год не выключэнне, кранае важныя тэмы для супольнасці свядомых, спагадлівых і актыўных людзей. Фільмы праграмы-2020 найлепшым чынам рэзаніруюць з падзеямі ў Беларусі, якія сёння хвалююць нас. Возьмем, напрыклад, фільм «Феміністарка» аб былой шведскай міністарцы замежных спраў Маргот Вальстром, якая ўпершыню выступіла з феміністычнай павесткай. Альбо фінскі фільм «Сіла звычкі» аб невідавочных выпадках выкарыстання сілы і прымуса ў адносінах да жанчын.

Мы спадзяёмся, што насычаная і актуальная праграма кінафестывалю «Паўночнае ззянне» дапаможа нам падтрымаць у вас веру, моц і любоў.
2. Як жа мы ўсе стаміліся ад фармату анлайн! Чаму анлайн?
Калі мы ў пачатку лета вырашылі правесці кінафестываль у анлайн-фармаце, для нас гэта значыла выпрабаваць новую платформу, якую дыктуе гэты цяжкі час, прайсці праз гэты вопыт самім, зразумець, наколькі ён працуе ў кантэксце Беларусі, ці гатовыя беларусы плаціць нават невялікія грошы за легальны прагляд унікальнага кантэнту анлайн. Акрамя таго, ва ўмовах COVID-19 гэта быў адзіны спосаб паказаць нашыя фільмы з бяспекай для гледачоў. Нагадаем, што кінатэатры ў Беларусі адкрыліся зноў толькі 10 верасня.

Зрабіўшы велізарную працу па стварэнні магчымасці правесці фестываль у анлайн-фармаце, мы не хацелі б упускаць магчымасць выпрабаваць гэтую новую форму, і не хацелі б змарнаваць усю працу, якую мы рабілі, каб гэтая магчымасць у нас была.

Мы не чакаем вялікай колькасці гледачоў, як звычайна ў нас бывае, таму што мы разумеем, што вы, напэўна, заняты іншымі рэчамі ў гэты нялёгкі час. Але мы будзем рады, калі ў вас атрымаецца знайсці час на прагляд праграмы кінафестывалю «Паўночнае ззянне» і здолееце падтрымаць нас ў анлайн, каб у будучыні мы маглі не проста вярнуцца афлайн, а вярнуцца ўвогуле.
3. Чаму вы не паказваеце фільмы бясплатна? Беларусы зараз не маюць грошай на кіно, яшчэ і ў анлайне!
Мы мяркуем, што любая праца павінна быць аплачана. І, зыходзячы з такой логікі, што правы на паказ фільмаў нам таксама не дастаюцца бясплатна, мы лічым, што справядліва паказваць фільмы на платнай аснове. У гэтым годзе, улічваючы, што фестываль праходзіць анлайн і беручы ва ўвагу складаную сітуацыю ў Беларусі, мы пастараліся зрабіць кошт максімальна даступным. Таксама мы лічым, што салідарнасць і падтрымка павінны быць узаемнымі і працаваць у абодва бакі.

Як звычайна, івэнты (падзеі) кінафестывалю даступны ўсім бясплатна. Толькі ў гэтым годзе яны пройдуць у фармаце анлайн. Усё, што вам трэба зрабіць, — гэта загадзя зарэгістравацца, каб далучыцца да падзеі ў рэальным часе праз Zoom, альбо далучыцца да трансляцыі на нашай старонцы ў Facebook альбо на канале кінафестывалю ў YouTube.
4. Чаму нельга глядзець фільмы па-за межамі Беларусі?
Гэта звязана з тым, што набыць правы на паказ фільмаў у межах адной краіны мы ў дадзены момант маглі сабе дазволіць, а набыць правы на паказ ва ўсім свеце — гэта занадта дорага. Каб не парушаць аўтарскае права праваўладальнікаў кантэнту, мы абмяжоўваем да прагляду фільмаў толькі тэрыторыяй Беларусі. З другога боку, у гэтым наша эксклюзіўнасць. Толькі ў беларусаў ёсць магчымасць глядзець фільмы кінафестывалю «Паўночнае ззянне» ў такой канфігурацыі.
5. А фестываль «Паўночнае ззянне» сапраўды вернецца ў кінатэатры ў будучыні?
Мы мяркуем, што нічога не можа замяніць вялікі экран і жывую размову. Таму мы хочам вярнуцца ў кінатэатры ў будучыні і далей падтрымліваць жывыя адносіны праз нашыя варкшопы, лекцыі, майстар-класы і прагляды кіно. Мы не выключаем мажлівасці камбінавання фарматаў анлайн і афлайн у будучыні, калі гэта будзе мець сэнс і будзе дастаткова зручным. Адным з плюсаў анлайн-фармату з’яўляецца тое, што цяпер праграма кінафестывалю даступна для прагляду не толькі ў Мінску, але і па ўсёй краіне. Такім чынам, кінафестываль у нейкім сэнсе становіцца больш даступным. Для нас гэта таксама важна. Паглядзім, ці выкарыстаеце вы гэтую магчымасць — глядзець «Паўночнае ззянне» ў рэгіёнах.
6. Як усім гэтым увогуле карыстацца?
За дастаткова кароткі тэрмін мы імкнуліся з нуля стварыць платформу, якая, па-першае, будзе ахоўваць фільмы ад пірацтва, па-другое, будзе максімальна зручнай для карыстальнікаў. Усё, што вам патрэбна, гэта як звычайна ўважліва азнаёміцца з праграмай кінафестывалю, выбраць фільмы альбо цэлыя праграмы, якія вас зацікавяць, і аплаціць доступ для прагляду. Падрабязная інструкцыя, як набываць доступ да фільмаў, знаходзіцца ТУТ.

Паколькі для нас гэта першы досвед правядзення кінафестывалю ў фармаце анлайн, мы не выключаем магчымасці таго, што нейкія моманты мы не прадумалі альбо прадумалі недастаткова добра. Таму тут мы спадзяёмся на вашу цярплівасць і разуменне, а таксама на зваротную сувязь. Калі ласка, дзяліцеся сваім карыстальніцкім вопытам, каб у будучыні мы маглі, калі неабходна, палепшыць усю сістэму згодна з вашымі пажаданнямі.
7. Ці ёсць магчымасць глядзець фільмы з мабільнага ўстройства?
Так. Калі вы аплацілі доступ да прагляду кантэнту, вы можаце глядзець яго і з вашага мабільнага ўстройства. Але гэтая магчымасць даступна толькі для мабільных тэлефонаў з сістэмай Android. На платформе IOS (iPhone, iPad) прайграванне, на жаль, не падтрымліваецца.
8. А што рабіць у выпадку, калі штосьці не працуе?
Калі раптам у вас штосьці не працуе, калі ласка, не панікуйце і не лайце нас. Пішыце на адрас support@northernlightsff.com, і мы адкажам вам і пастараемся дапамагчы з вашай праблемай.
9. У мяня не атрымліваецца паглядзець трэйлер/фільм. Чаму?
Увесь кантэнт на нашай плафторме абаронены пры дапамозе DRM Google Widevine. З-за гэта спіс браўзераў, якіяпадтрымліваюцца, абмежаваны да Chrome, Firefox, Opera. У браўзерах Safari и Edge прайграванне, на жаль, не падтрымліваецца. Для таго, каб праверыць, ці прайграе ваш браўзер абароненае відэа, калі ласка, скарыстайцеся старонкай праверкі: https://online.northernlightsff.com/movies/drmtest/
10. Чаму фільмы даступны толькі на працягу аднаго дня?
Гэта таксама звязана з абмежаваннямі ад праваўладальнікаў і рэсурсамі кінафестывалю. Больш за тое, мы хацелі максімальна захаваць фестывальны фармат, а не ператвараць кінафестываль у звычайную анлайн-медыятэку. Магчыма, у будучыні мы адаптуем платформу і ўмовы зменяцца, але ў дадзены момант аб гэтым казаць рана і складана.
11. А калі я пажадаю перагледзець фільм – гэта магчыма?
Не. Кожны карыстальнік, які аўтарызаваўся і аплаціў доступ для прагляду, мае права прагледзець кожны фільм толькі адзін раз з аднаго ўстройства. Такама ў плэеры няма функцыі перамоткі. Кожны фільм даступны ў пэўны дзень на працягу цэлага дня, без прывязкі па часе ў гэты дзень. Усе гэтыя абмежаванні звязаны з пытаннямі правоў на кантэнт, а таксама з нашымі тэхнічнымі магчымасцямі на дадзены момант.
Нашы партнёры
Нашы партнёры