НІНДЗЯ, ЯКІ РАЗБІВАЕ СТЭРЭАТЫПЫ (LIVE)

Як здымаць камедыю на табуяваную тэму

Фільмам «Дзіцёнак-ніндзя» рэжысёрка Інгвіль Свэ Фліке ломіць табу, лёгка ды іранічна размаўляючы на ўразлівыя тэмы непажаданай цяжарнасці, чайлд-фры і абортаў. Чаму яна вырашыла зняць камедыю пра выбар жанчыны быць або не быць маці? І якую рэакцыю атрымала ад публікі? Пра гэта рэжысёрка раскажа ў размове з нарвежскім акторам і мастацкім кіраўніком талінскага тэатра Vaba Lava Харальдам Томпсанам Розэнстромам. Да гутаркі далучыцца выканаўца галоўнай ролі, акторка Крысцін Куят Торп, якая падзеліцца, ці блізкія ёй праблемы яе гераіні.

Мова івента: англійская з паслядоўным перакладам на беларускую

Глядзіце падзею:
YouTube

Інгвіль Свэ Фліке — нарвежская рэжысёрка і сцэнарыстка. Яна вядомая сваімі фільмамі «Жанчыны ў мужчынскіх кашулях вялікага памеру», «Яблык», «На сваім полі» і «Дзіцёнак-ніндзя». Фільмы Інгвіль маюць выразную жаночую перспектыву і дзейнічаюць у прасторы паміж камедыяй і драмай.

Крысцін Куят Торп — нарвежская акторка, цяпер жыве ў Капенгагене, Данія. Увесну 2021 года знялася ў камедыі-драме «Дзіцёнак-ніндзя», якая прынесла ёй прэмію «Аманда» за найлепшую жаночую ролю. Стужка таксама атрымала ўзнагароду як найлепшая камедыя на Еўрапейскім кінафестывалі ў 2021 годзе, а яе поспех як у Нарвегіі, так і за мяжой прыцягнуў увагу да працы акторкі. У 2022 годзе яна сыграла галоўныя ролі ў нарвежскім фільме Sick of Myself Крыстафера Борглі і дацкім фільме The Great Silence Катрын Брокс. Акрамя таго, у 2020 годзе Крысцін апублікавала самаілюстраваную кнігу Hjelp småkrypene, якая ўваходзіць у спісы бестселераў дзіцячай літаратуры. Акторка таксама мае ступень мастака-пастаноўшчыка Дацкай каралеўскай акадэміі архітэктуры, дызайну і кансервацыі ў Капенгагене.

Харальд Томпсан Розэнстром — нарвежскі актор, рэжысёр і мастацкі кіраўнік. Харальд скончыў акторскую школу-студыю МХАТ у 2012 годзе пад кіраўніцтвам Кірыла Сярэбранікава. Працаваў як актор тэатра і кіно ў Францыі, Эстоніі, Нарвегіі і Расіі (у МХАТ і Гогаль-цэнтры). Харальд да нядаўняга часу быў дырэктарам тэатральнай школы Solbakken folkehøgskole. Цяпер ён мастацкі кіраўнік і куратар эстонскага тэатра Vaba Lava. Таксама працуе рэжысёрам у тэатры і кіно.