Дзеянне фільма разгортваецца ў двух паралельных сусветах. У першым ёсць толькі Фрэнкі — растрапаная і сарамлівая дзяўчынка-падлетак, усё жыццё якой складаецца з выслухоўвання маралей ад маці, вячорак з адзінай сяброўкай Кацяй і дарэмных спроб вызначыцца са сваёй будучыняй. Фрэнкі трывожыць зменлівасць і невядомасць, асабліва калі справа тычыцца кахання. У другім сусвеце ёсць старамодны гатэль, аздоблены ў эстэтыцы фільмаў Жан-П'ера Жэнэ ды Мішэля Гандры і населены разнамаснымі персанажамі. Знаходзіцца гатэль у галаве ў Фрэнкі, а ўсе яго супрацоўнікі — гэта яе асобы, якія па чарзе займаюць цела дзяўчыны ў розных складаных сітуацыях: швейцар Фрэнк адказвае за знаходлівасць і дасціпнасць, пакаёўка Эла — за сэксуальнасць, лобі-бой Лені — за дзіцячую натуру. Аб тым, што існуе некалькі версій Фрэнкі, не ведае ніхто. Усё выйдзе з-пад кантролю, калі гераіня закахаецца ў новага хлопца Каці.