Фестываль кіно Паўночных і Балтыйскіх краін «Паўночнае ззянне»— штогадовы фестываль, які прапануе беларускім гледачам найноўшыя гульнявыя і дакументальныя фільмы Паўночнай Еўропы і краін Балтыі. Фестываль быў упершыню арганізаваны ў 2015 годзе і працягвае ладзіцца пры падтрымцы Офіса Савета Міністраў Паўночнаеўрапейскіх краін у Літве.

На мове кіно мы імкнёмся распавесці пра асаблівасці жыцця і менталітэту жыхароў пяці Паўночнаеўрапейскіх краін і трох Балтыйскіх. Агулам фестываль прадстаўляе фільмы са Швецыі, Фінляндыі, Нарвегіі, Даніі, Ісландыі, Літвы, Латвіі і Эстоніі. З 2018 года ў праграме кінафестывалю ўдзельнічаюць таксама фільмы з Фарэрскіх астравоў, з 2019 — з Грэнландыі.

Нашая мэта — несці мастацтва кіно, магію паўночнай культуры пераважна ў перакладзе на беларускую мову не толькі ў сталіцу, але і ў рэгіёны Беларусі: паказы «Паўночнага ззяння» ладзіліся ў Гомелі, Віцебску, Гродне.

Кiнафестываль «Паўночнае ззянне» таксама з'яўляецца адметнай пляцоўкай Беларусі для абмену досведам i новымi ідэямі паміж прафесіяналамі і аматарамі ў сферы кіно. У дні фестывалю і на працягу года арганізатары «Паўночнага ззяння» ладзяць дадатковыя паказы, лекцыі, майстар-класы ды іншыя захапляльныя мерапрыемствы для беларускіх рэжысёраў, прадзюсараў і аматараў як у галіне гульнявога кіно, так і дакументальнага.

У 2020 годзе фестываль вымушаны быў перайсці ў фармат online, што і працягвае рабіць у 2021 годзе па залежных і незалежных ад каманды прычынах. Квіткі на прагляд фільмаў у online можна набыць праз нашую платформу, а таксама праз мабільнае прылажэнне.